ബോബി ചെമ്മണ്ണൂർ എന്ന ബോചെയെ അറിയാത്ത മലയാളികളില്ല.ഉടുപ്പിലും നടപ്പിലുമുള്ള പ്രത്യേകതകൾ മാത്രമല്ല സ്വന്തം ബിസിനസ്സിന്റെ പ്രചാരണത്തിനും വിപുലീകരണത്തിനും സ്വീകരിക്കുന്ന നവീന ആശയങ്ങളുമാണ് ബോചെയെ മറ്റുള്ളവരിൽ നിന്ന് വ്യത്യസ്തനാക്കുന്നത്.

ഒരു വ്യക്തി സ്വയം ഒരു ബ്രാൻഡാവുന്നത് എങ്ങിനെയെന്നറിയാൻ ബാചെയെ പഠിച്ചാൽ മതി. മറഡോണ ഉൾപ്പെടെയുള്ള രാജ്യാന്തര സെലിബ്രിറ്റികളെ പല ഘട്ടങ്ങളിൽ തന്റെ ബിസിനസ്സിന്റെ ബ്രാൻഡ് അംബാസഡർമാരാക്കിയിട്ടുണ്ടെങ്കിലും ചെമ്മണ്ണൂർ ഗ്രൂപ്പിന്റെ പ്രധാന ബ്രാൻഡ് അംബാസഡർ ബോബിചെമ്മണ്ണൂർ എന്ന ബോചെ തന്നെയാണ്.

സമീപകാലത്ത് ബോബി തുടങ്ങിയ ബോചെ ടീ എന്ന പുതിയ ഉൽപ്പന്നം വില്പനയ്ക്കൊപ്പം വിവാദത്തിനും കാരണമായിരിക്കുകയാണ്. 40 രൂപ നൽകി തേയിലപ്പൊടി വാങ്ങുന്നവർക്കായി ഏർപ്പെടുത്തിയ സമ്മാന പദ്ധതിയാണ് വിവാദമായത്. ദിവസേന 13704 പേർക്ക് സമ്മാനം നൽകുന്ന പദ്ധതിയാണ് തേയിലയുടെ പ്രൊമോഷനെന്ന പേരിൽ ബോ ചെ ഏർപ്പെടുത്തിയിരിക്കുന്നത്. ഒന്നാം സമ്മാനം 20 ലക്ഷം രൂപയാണ്. 25000. 10000 , 5000 . 1000 . 500, 100 എന്നിങ്ങനെയാണ് സമ്മാന ഘടന. ഇതിനു പുറമേ 25 കോടി രൂപയുടെ ബമ്പർ സമ്മാനവുമുണ്ട്.

ഭാഗ്യക്കുറി വകുപ്പ് ഏജൻസികൾ നൽകും പോലെ ബോചെ ടീയും വ്യാപകമായി ഏജൻസികൾ നൽകുന്നുണ്ട്. ഭാഗ്യക്കുറി ടിക്കെറ്റ് എടുക്കുന്നവർക്ക് സമ്മാനമടിച്ചില്ലെങ്കിൽ കാശ് പോക്കാണ്. പക്ഷേ ബോചെ ടീക്ക് ചെലവാക്കുന്ന തുകയ്ക്ക് കിട്ടുന്ന തേയിലയ്ക്ക് പുറമെയാണ് സമ്മാനങ്ങൾ. ഭാഗ്യാന്വേഷിക്കൽ ലോട്ടറിയെ വിട്ട് ബോചെ ടീയിലേക്ക് നീങ്ങാൻ ഇത് കാരണമാവുന്നു.