തലസ്ഥാനത്തെ ഏത് സാംസ്കാരിക പരിപാടിയും ആദ്യമറിയുകയും അത് തനിക്ക് പരിചയവും സൗഹൃദവുമുള്ള മറ്റു കലാസ്വാദകരെ അറിയിക്കുകയും ചെയ്യുക എന്ന ശീലം വർഷങ്ങളായി കാത്തു സൂക്ഷിച്ചിരുന്നയാളായിരുന്നു രഘുരാമൻ പോറ്റി.


സംഗീത പരിപാടികളിലെ നിറസാന്നിദ്ധ്യമായിരുന്ന പോറ്റിസാറിന് സംഗീത രംഗത്തെ മഹാരഥൻമാരുമായി ആത്മ ബന്ധമാണ് ഉണ്ടായിരുന്നത്. പരിപാടികളുടെ വലിപ്പച്ചെറുപ്പം നോക്കാതെ, ആസ്വാകരെ സദസ്സിലെത്തിക്കാൻ ,
തനിക്കുണ്ടായിരുന്ന വിപുലമായ സൗഹൃദങ്ങളെ അദ്ദേഹം പ്രയോജനപ്പെടുത്തിയിരുന്നു.. 


ആദരവ് ഏറ്റുവാങ്ങിയശേഷം തനിക്ക് രണ്ടു വാക്ക് സംസാരിക്കാറുണ്ട് എന്നു പറഞ്ഞ് മൈക്ക് വാങ്ങിയ അദ്ദേഹം 'ദേവരാജൻ മാസ്റ്റർ' എന്നു പറഞ്ഞു തുടങ്ങി അടുത്ത വാക്കിലേക്ക് കടക്കാനാവാതെ കുഴഞ്ഞു വീഴുകയായിരുന്നു.സന്തോഷത്തിന്റെ പാരമ്യത്തിൽ അദ്ദേഹം ഏറെ ഇഷ്ടപ്പെട്ടിരുന്ന കലാവേദികളിലൊന്നിൽ നിറഞ്ഞ സദസ്സിനെ സാക്ഷിനിറുത്തിയുള്ള വിനീതമായ വിടവാങ്ങൽ.

സംഘാടകർ ഉടൻ അദ്ദേഹത്തെ  ആശുപത്രിയിലെത്തിച്ചെങ്കിലും അദ്ദേഹം പിന്നീട് ആ അവസ്ഥയിൽ നിന്ന് മടങ്ങി വന്നില്ല. 


കലാപരിപാടികളിൽ പോറ്റി സാറിന് വലിപ്പച്ചെറുപ്പങ്ങളുണ്ടായിരുന്നില്ല. പലപ്പോഴും സംഘാടകരെ അന്വേഷിച്ചെത്തി വിവരം ശേഖരിക്കുകയായിരുന്നു അദ്ദേഹത്തിന്റെ പതിവ്. ചെറിയ പരിപാടികൾ സംഘടിപ്പിക്കുന്നവർ ആളെക്കൂട്ടാൻ പോറ്റിസാറിന്റെ സഹായം തേടുന്നതും പതിവായിരുന്നു. ഓരോ പരിപാടിയുടെയും സ്വഭാവമനുസരിച്ച് അതിൽ താത്പര്യമുള്ളവരെ സ്വന്തം ചെലവിൽ അറിയിക്കുന്ന പോറ്റിയുടെ ശീലം സംഘാടകർക്കും ആസ്വാദകർക്കുമിടയിൽ സൗഹൃദത്തിന്റെയും ആസ്വാദനത്തിന്റെയും അപൂർവ്വമായ ഒരു പാലം തീർത്തു

കോട്ടയ്ക്കകത്തെ വീട്ടിൽ നിന്ന് സായാഹ്നങ്ങളിൽ വേദികളിലേക്കുള്ള പദയാത്ര മതിയാക്കി പോറ്റി സാർ യാത്രയാവുന്നു.
ഇത്തരം മനുഷ്യരിലൂടെയാണ് നല്ല കലയും സാംസ്കാരിക ചലനങ്ങളും സജീവമാകുന്നത് എന്ന് ഓർമ്മിപ്പിച്ചു കൊണ്ട്.....




വേദികളെ പ്രണയിച്ച പോറ്റി സാറിന് ആദരവോടെ വിട

ഇ.വിയും കടന്നു പോയി. കുറച്ചു ദിവസങ്ങൾക്ക് മുൻപ് ചെന്നൈയിൽ നിന്ന് പി.കെ. ശ്രീനിവാസൻ വിളിച്ചപ്പോൾ  ഇ.വി. ശ്രീധരൻ്റെ കാര്യവും സംസാരിച്ചിരുന്നു. അവസ്ഥ പൊതുവിൽ മോശമാണെന്നും പറഞ്ഞിരുന്നു. 


എം.എസ്. മണിസാർ എന്ന ഇതിഹാസ തുല്യനായ പത്രാധിപരുടെ നേതൃത്വത്തിൽ എസ്. ജയചന്ദ്രൻ നായരും എൻ.ആർ. എസ്സും ചേർന്ന് കലാകൗമുദി എന്ന രാഷ്ട്രീയ സാംസ്കാരിക വാരിക ആരംഭിച്ച് കേരളത്തേയും മലയാളത്തേയും ആവേശ കൊടുമുടി കയറ്റിയപ്പോൾ അതിൻ്റെ പിന്നിൽ നിശബ്ദരായി പ്രവർത്തിച്ച ചില ധിഷണാശാലികൾ ഉണ്ടായിരുന്നു. അവരിൽ ഒരാളാണ് ഇ.വി. ശ്രിധരൻ. പിന്നെ കള്ളിക്കാട് രാമചന്ദ്രൻ, വേലപ്പൻ തുടങ്ങിയവർ. കാലഘട്ടത്തിൻ്റെ അനിവാര്യമായ ഒരു സങ്കലനമായിരുന്നു അത്. കേരളത്തിൻ്റെയും മലയാളികളുടെയും സംവേദന ശീലങ്ങളെ മാറ്റി മറിച്ചാണ് അവർ കടന്നു പോയത്. 



ഇ വി ശ്രീധരനും ഞാനും ഒരേ ഓഫീസ്  മന്ദിരത്തിനുള്ളിൽ രണ്ട് ശ്രേണികളിലായി വർഷങ്ങളോളം പണിയെടുത്തവരാണ്. ഇ.വി. കലാകൗമുദിയിലും, ഞാൻ കേരള കൗമുദിയിലും. സംസാരിക്കുന്നതിലും കൂട്ടുകൂടുന്നതിലും വലിയ പിശുക്കായിരുന്നു ഇവിക്ക്. അന്തർമുഖനെന്ന് പറഞ്ഞാൽ പോരാ.  തീർത്തും മതിൽ കെട്ടി അടച്ച വ്യക്തിത്വം . വലിയ പരിചയമുണ്ടായാലും ഇങ്ങോട്ട് സംസാരിച്ചില്ലെങ്കിൽ അങ്ങോട്ട് കയറി സംസാരിക്കാത്ത പ്രകൃതമാണ് എൻ്റേതും. അതിനാൽ ഇവിയും ഞാനും തമ്മിൽ ആകെ സംസാരിച്ചിട്ടുള്ളത് തന്നെ ഏതാനും വാക്കുകൾ മാത്രമാകാം. പരസ്പരം മുഖാമുഖം വരുമ്പോൾ രണ്ടു പേരും മൃദുവായി ചിരിച്ച് കടന്നു പോകും. അതായിരുന്നു ഞങ്ങളുടെ സൗഹൃദം. എങ്കിലും പരസ്പരം മനസ് കൊണ്ട് നല്ല അടുപ്പമായിരുന്നു.


അദ്ദേഹത്തിൻ്റെ കണ്ണുകൾക്ക് ഒരു പ്രത്യേകത ഉണ്ടായിരുന്നു. എപ്പോഴും നിറഞ്ഞു തുളുമ്പി നിൽക്കും. ആ ജലരാശിയിലൂടെയാണ് കൂർത്ത ആ നോട്ടം കടന്നു വരുന്നത്. 
ഇനി ഒരിക്കലും തിരിച്ചു വരാത്ത ശ്രേഷ്ഠമായ ഒരു കാലഘട്ടമാണ് നമ്മുടെ കൺമുന്നിൽ നിന്ന് മാഞ്ഞു പോകുന്നത്. 




സൂക്ഷ്മ നോട്ടത്തിന്റെ ഇവി.

മദ്രാസിൽ പത്രപ്രവർത്തനം തുടങ്ങിയ ഇ വി ശ്രീധരൻ കലാകൗമുദിയിലൂടെ തിരുവനന്തപുരത്തെത്തി. കോൺഗ്രസ്സിൻ്റെ മുഖപത്രമായിരുന്ന വീക്ഷണത്തിലും രണ്ടുവർഷം പ്രവർത്തിച്ചു.


കേരള കൗമുദി പത്രത്തിലെ കോളമിസ്റ്റായിരുന്നു. തിരുവനന്തപുരത്തെ പ്രമുഖ സാംസ്കാരികപ്രവർത്തകരുമായി അടുത്ത ബന്ധം പുലർത്തി. യുവാക്കളായ ഒട്ടേറെപ്പേരെ എഴുത്തിന്റെ വഴിയിലേക്ക് നയിച്ച എഴുത്തുകാരനുമാണ് ഇവി ശ്രീധരൻ.

എലികളും പത്രാധിപരും, ഈ നിലാവലയിൽ, താമരക്കുളത്തെ അമ്മുക്കുട്ടി, ഒന്നാംപ്രതി, ജാനകിയുടെ സ്മാരകം, ഓർമ്മയിലും ഒരു വിഷ്ണു, ലബോറട്ടറിയിലെ പൂക്കൾ തുടങ്ങിയവയാണ് പ്രധാന കഥാസമാഹാരങ്ങൾ. ദൈവക്കളി, ഏതോ പൂവുകൾ, നന്ദിമാത്രം, കാറ്റുപോലെ എന്നിവ ശ്രീധരന്റെ നോവലുകളാണ്

ഇ വി ശ്രീധരൻ ഇനി കഥയോർമ്മ

മാർച്ച് 30 , 2005; സാഹിത്യത്തിലെ മഹാമേരു  ഓ.വി വിജയൻ കടന്നു പോയിട്ട് ഇരുപത് വർഷങ്ങൾ. സാഹീതി ലോകത്തെ ഭാവനാതലങ്ങളെയും സൗന്ദര്യ ശാസ്ത്രത്തെയും സംവേദനത്തയും രണ്ടായിപ്പകുത്ത ഖസാക്ക് വിസ്മയിപ്പിക്കുന്ന താജ്മഹലായി നമുക്കു മുന്നിൽ  ഇന്നും പ്രോജ്ജ്വലിക്കുന്നുണ്ട്.

മനുഷ്യ ജീവിതത്തിലെ എല്ലാ പരിമിതികളെയും അതിലംഘിക്കുന്ന വിശ്വാത്തരമായ പൊരുളുകളും സ്വർണ പാത്രം കൊണ്ടു മൂടിക്കിടക്കുന്ന ഉണ്മകളും അദ്വൈതത്തിന്റെ അഗാധമായ ഉള്ളറിവുകളും  ഒരു പരിവ്രാജകന്റെ വിനയത്തോടെ, സന്ദേഹങ്ങൾ ഏതുമില്ലാതെ,അദ്ദേഹം തന്റെ രചനകളിലൂടെ തുറന്നു വച്ചു. വിശുദ്ധവും പവിത്രവും മാനവികവുമായ കാഴ്ചകളും കാഴ്ച്ചപ്പാടുകളും  പങ്കിട്ടു.


കാപട്യവും പൊള്ളത്തരവും സംവൃതവുമായ മലയാളി സമൂഹം അതുൾക്കൊണ്ടില്ല. അധോമുഖമായ രാഷ്ട്രീയവും ആ പ്രവചന സ്വരങ്ങളെ എതിർക്കാനും തിരസ്കരിക്കാനുമാണ് വെമ്പൽ പൂണ്ടത്.  


മൂർത്തമായ ഒരു പ്രതിഭയോടും പ്രതിഭാസത്തോടും പഴയ ഞണ്ടുകളി പരീക്ഷിച്ചവരാണ് നാം. മാതൃഭൂമിയിൽ ഖണ്ഡശ്ശ: പ്രസിദ്ധീകരിച്ച പ്രസിദ്ധി നേടിയ ഖസാക്കിനു ശേഷം ഓ.വി വിജയൻ അയച്ചു കൊടുത്ത കഥ മടക്കത്തപാലിൽ കൃത്യമായി തിരിച്ചയച്ചപ്പോൾ ചുമതലക്കാരൻ സാക്ഷാൽ എം.ടി വാസുദേവൻ നായർ.
എംടി പദവി ഒഴിയുംവരെ ഓ.വി വിജയന്റെ ഒരു രചനയും മാതൃഭൂമിയിൽ വെളിച്ചം കണ്ടില്ല എന്നതും അനുഭവ സാക്ഷ്യം. മാത്രമല്ല ബങ്കർവാടി എന്ന കന്നഡ നോവലുമായി ഖസാക്കിനെ ബന്ധിപ്പിച്ച് ജിഎൻ പണിക്കർ സാർ എഴുതിയതോ അദ്ദേഹത്തെക്കൊണ്ട്എഴുതിച്ചതോ ആയ ലേഖനവും മാതൃഭൂമിയിൽ ഇടം പിടിച്ചു.മലയാള നാടിലും കലാകൗമുദിയിലുമായിരുന്നു ഓ.വി വിജയന്റെ കൃതികളും കുറിപ്പുകളും പംക്തികളും ഏറെയും 
പ്രസിദ്ധീകൃതമായത്

പ്രവാചകാ, പ്രണാമം


ഉത്സവത്തിനും മേട വിഷുവിനോട് അനുബന്ധിച്ച പൂജകൾക്കുമായി ശബരിമല നട തുറന്നു.ഇന്ന് വൈകിട്ട് 4 മണിക്ക് തന്ത്രി കണ്ടരര് രാജീവരുടെ സാന്നിധ്യത്തിൽ മേൽശാന്തി അരുൺ കുമാർ നമ്പൂതിരി നടതുറന്ന്  ദീപം തെളിയിക്കും. 

ഏപ്രിൽ രണ്ടിന് രാവിലെ 9 .45  നും  10 .45  നും   മധ്യേ തന്ത്രി കണ്ടരര് രാജീവരുടെ കാർമികത്വത്തിൽ ഉത്സവത്തിന് കൊടിയേറും. ഏപ്രിൽ 11 നാണ്  പമ്പാനദിയിൽ ആറാട്ട്. 

തിരുവുത്സവം :ശബരിമലയിൽ  തുടർച്ചയായി 18 ദിവസം ദർശനത്തിന് അവസരം


ഹൃദയാഘാതത്തെ തുടർന്ന് കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. വീട്ടിൽ വീണ് പരിക്കേറ്റതിനെ തുടർന്ന് എട്ട് ദിവസം മുൻപാണ് മങ്കൊമ്പ് ഗോപാല കൃഷ്ണനെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചത്. ചികിത്സയിലിരിക്കെ ന്യുമോണിയ ബാധിച്ചിരുന്നു. ഇന്ന് വൈകുന്നേരം 4.55 ന് ഹൃദയാഘാതത്തെ തുടർന്നാണ് മരണം സംഭവിച്ചത്.

78 വയസ്സായിരുന്നു. 

ആശുപത്രിയിൽ 3 മക്കളും മരണ സമയത്തുണ്ടായിരുന്നു. ബാലചന്ദ്രൻ ചുള്ളിക്കാട് അടക്കം ആശുപത്രിയിൽ എത്തിയിരുന്നു. സംസ്കാര സമയം അറിയിച്ചിട്ടില്ല.

ഏറ്റവും കൂടുതൽ ചിത്രങ്ങൾ മലയാളത്തിലേയ്ക്ക് മൊഴിമാറ്റിയത് മങ്കൊമ്പ് ഗോപാലകൃഷ്ണൻ ആണ്. ബാഹുബലി ഉൾപ്പെടെ 200 ചിത്രങ്ങളിൽ അദ്ദേഹം സഹകരിച്ചു.

മങ്കൊമ്പ് ഗോപാലകൃഷ്ണന്റെ നിര്യാണത്തിൽ മുഖ്യമന്ത്രി പിണറായി വിജയൻ അനുശോചനം രേഖപ്പെടുത്തി. തീർത്തും കേരളീയമായ സാംസ്‌കാരിക ജീവിതത്തിന്റെ സ്പർശമുള്ള ഗാനങ്ങൾകൊണ്ട് സഹൃദയമനസ്സിൽ സ്ഥാനം നേടിയ ചലച്ചിത്ര ഗാനരചയിതാവായിരുന്നു മങ്കൊമ്പ് ഗോപാലകൃഷ്ണനെന്ന് മുഖ്യമന്ത്രി ഫേസ്ബുക്കിൽ കുറിച്ചു. അദ്ദേഹത്തിന്റെ വിയോഗത്തിൽ ദുഃഖവും അനുശോചനവും രേഖപ്പെടുത്തുന്നതായും മുഖ്യമന്ത്രി പറഞ്ഞു. 


Recent in Culture