പ്രധാനമന്ത്രി നരേന്ദ്ര മോദിയുടെ കഴിഞ്ഞ 11 വർഷത്തെ ഭരണം രാജ്യത്തിൻ്റെ വളർച്ചയിലും വികസനത്തിലും ഉണ്ടാക്കിയ മാറ്റം അത്ഭുതാവഹമായിരുന്നു.2013 ൽ ലോകത്തെ തകരുന്ന അഞ്ച് സമ്പദ് വ്യവസ്ഥകളിൽ ഒന്നായിരുന്ന ഇന്ത്യയെ, കേവലം 10 വർഷങ്ങൾ കൊണ്ട് ലോകത്തിലെ ഏറ്റവും വലിയ നാലാമത്തെ സാമ്പത്തിക ശക്തിയായി ഉയർത്തിയെടുത്തു. ദേശീയ താത്പര്യം മാത്രം ലക്ഷ്യമാക്കി മോദി സ്വീകരിച്ച നടപടികൾ ഇന്ത്യയെ ലോകത്തിലെ നിർണ്ണായക രാഷ്ട്രീയ ശക്തിയാക്കി മാറ്റി. ഭാരതീയർ കണ്ട് പരിചയിച്ച സാധാരണ രാഷ്ട്രീയ നേതാക്കളിൽ നിന്ന് വിഭിന്നമായി; വ്യക്തി താത്പര്യങ്ങളോ, കുടുംബ താത്പര്യങ്ങളോ, പാർട്ടി താത്പര്യങ്ങളോ നോക്കാതെ ‘Nation First ‘ എന്ന ചിന്താഗതിയെ മുറുകെ പിടിച്ച് മുന്നോട്ട് പോകുന്ന മോദി രാജ്യത്തിൻ്റെ പ്രതീക്ഷയാകുമ്പോൾ, മറുവശത്ത് ലോകത്തിൻ്റെ കുശുമ്പിനും പാത്രമാകുന്നു.” മോദി അപകടകാരിയായ പ്രധാനമന്ത്രി” എന്ന് അമേരിക്കൻ പ്രസിഡൻ്റ് ഡൊണാൾഡ് ട്രംപ് വിശേഷിപ്പിച്ചതും ഇക്കാരണത്താലാകാം. ശക്തനായ ഭരണാധികാരിക്ക് വേണ്ട അനേകം ഗുണങ്ങളിൽ ഒന്നാണ് കടുത്ത തീരുമാനങ്ങൾ എടുക്കാനുള്ള കഴിവ്. ഇന്ത്യൻ ഭരണഘടനയിലെ 370-ാം അനുഛേദം റദ്ദാക്കിയ നടപടി, ബാലാക്കോട്ട് വ്യോമാക്രമണം, ഓപ്പറേഷൻ സിന്ദൂർ എന്നിവ മോദിയുടെ കടുത്ത തീരുമാനത്തിൻ്റെ പരിണത ഫലങ്ങളായിരുന്നു. പാകിസ്താൻ പിന്തുണയോടെ രാജ്യത്ത് കള്ളനോട്ടുകൾ വ്യാപകമായി പ്രചരിപ്പിച്ച് സമാന്തര സമ്പദ് വ്യവസ്ഥയിൽ കൂടി ഇന്ത്യയെ സാമ്പത്തികമായി തകർക്കാൻ ശ്രമിച്ച ഛിദ്രശക്തികളെ ഉന്മൂലനം ചെയ്യാൻ മോദി കൈക്കൊണ്ട മറ്റൊരു തീരുമാനമായിരുന്നു നോട്ട് നിരോധനം. ഇതിനെ തുടർന്ന് നടപ്പാക്കിയ UPI സംവിധാനം ലോകത്തിന് തന്നെ മാതൃകയായി. സാമ്പത്തിക രംഗത്ത് ചലനാത്മകത നിലനിർത്താൻ ഇത് കരുത്തേകി. ദിവസേന 70 കോടി പണമിടപാടുകൾ UPI വഴി നടക്കുന്നു. രാജ്യത്തെ ഡിജിറ്റൽ പേയ്മെൻ്റിൻ്റെ 85 ശതമാനവും ഇന്ന് UPI വഴിയാണ് നടന്നു വരുന്നത്. പ്രധാനമന്ത്രി ജൻധൻ പദ്ധതി(PMJDY) രാജ്യത്തെ പാവപ്പെട്ട ജനങ്ങളെ ബാങ്കിംഗ് സേവനങ്ങളുടെ ഭാഗമാക്കി. സാമ്പത്തിക രംഗത്തെ വിപ്ലവമായി മാറിയ ജൻധൻ പദ്ധതി സർക്കാർ ധനസഹായങ്ങൾ ഗുണഭോക്താക്കളിൽ നേരിട്ട് എത്തിക്കുന്നതിന് സഹായകമായി മാറി. പാവപ്പെട്ടവർക്കായി സർക്കാർ നൽകുന്ന ധനസഹായം ഇടനിലക്കാർ വഴി ചോർന്ന് പോകാതെ ശരിയായ കൈകളിൽ എത്തണമെന്ന മോദിയുടെ തീരുമാനം ‘ഉൾച്ചേർന്ന വളർച്ച’ക്ക് കാരണമായി.