ഒടുവിൽ സർക്കാർ സിനിമയിലെ സ്ത്രീകളെ രക്ഷിക്കാനെത്തി എന്നു പറയാൻ വരട്ടെ. ആരോപണങ്ങൾ കാരണം മുഖം നഷ്ടപ്പെട്ട് അധികാര സ്ഥാനങ്ങൾ ഒഴിയേണ്ടി വന്നത് രണ്ടുപേർക്ക് ;രഞ്ജിത്തിനും സിദ്ദിക്കിനും.. സർക്കാരിന് പ്രിയപ്പെട്ട പലർക്കുംഎതിരെ വെളിപ്പെടുത്തലുകൾ പല കോണിൽ നിന്നും വന്നുകൊണ്ടേയിരിക്കുന്നു. ഒരു അന്വേഷണ സംവിധാനം വന്നാൽ പരസ്യപ്രതികരണങ്ങൾ ഒടുങ്ങിക്കൊള്ളുമെന്ന ബുദ്ധി ആരാണാവോ സർക്കാരിന് പറഞ്ഞു കൊടുത്തത്!എന്തായാലും വയനാട് ഉൾപ്പെടെയുള്ള അതിപ്രധാന വിഷയങ്ങൾ വിട്ട് മലയാളി ഇപ്പോൾ ഹേമാ കമ്മിറ്റി റിപ്പോർട്ട്‌ കാണാതെ പഠിക്കുകയാണ്. ഗുരുതരമായ ലൈംഗിക ദാരിദ്ര്യത്തിൽ ഉഴലുന്ന മലയാളി സമുഹത്തിന്റെ മടിത്തട്ടിലാണ് ജസ്റ്റിസ് ഹേമ കമ്മിറ്റിയുടെ ഡ്രീം റിപ്പോർട്ട് നിപതിച്ചത്.അതെ,ഇപ്പോൾ ആമോദത്തിന് ആകാശമാണതിര്! എൺപത് ശതമാനം വരുന്ന ഇവിടുത്തെ വൃദ്ധസമൂഹം അവരുടെ പടുതിരിയായ രതിസാമ്രാജ്യം ഈ റിപ്പോർട്ടിൽ ചാലിച്ച് നുണയുന്ന തിരക്കിലുമാണ്. നവയൗവ്വനവും വന്നു നാൾതോറും വളരുന്ന ഇക്കിളി കഥാസന്ദർഭങ്ങൾ തുടരനായി പ്രക്ഷേപിച്ച് വൃത്താന്ത പത്രക്കാരും രംഗം കൊഴുപ്പിക്കുന്നുണ്ട്.ആത്യന്തികമായിഇത് മലയാളി യുടെസ്വകാര്യതയിലേക്കുള്ള പരസ്യമായ ഒളിഞ്ഞു നോട്ടം മാത്രമാണ്.

ലക്ഷണമൊത്ത എല്ലാ സാമുഹിക ജീർണതകളും പേറുന്ന മറ്റൊരു മണ്ഡലം മാത്രമാണ് സിനിമാ രംഗം. വെള്ളിത്തിരയുടെ മാന്ത്രികതയും അറിയപ്പെടാനുള്ള അതിമോഹവും ആളുകളെ ഇവിടെ എത്തിക്കുന്നു.അവരുടെ കനവുകളിൽ ഒരു മിന്നും താരമുണ്ട്. .യൂണിവേഴ്സൽ ആർട്സ് & സ്പോർട്സ് ക്ളബ് നൽകിയ നാടോടി നൃത്തത്തിലും ഗ്രൂപ്പ് ഡാൻസിലും സബ്ജില്ലാ കലോത്സവത്തിലെ പുരസ്ക്കാരങ്ങളും ചെട്ടിനാട് സിമന്റു പോലെ തകർക്കാൻ കഴിയാത്ത ആത്മവിശ്വാസവുമാണ് അവരുടെ ഒസ്യത്ത്.

അയൽക്കൂട്ടത്തിലെ ഭാനുമതി അക്കൻ പ്രതിവാരം എഴുതുന്ന കുറിപ്പുകളുടെ സാധുത പോലും ഇല്ലാത്തതാണ് ജസ്റ്റിസ് ഹേമയുടെ റിപ്പോർട്ട് എന്നൊരു നിരീക്ഷണമുണ്ട്.വെറുമൊരു കമ്മിറ്റി റിപ്പോർട്ട് ;അതിനൊരു നെറ്റിപ്പട്ടമായി ഒരു ജസ്റ്റിസിനെയും ഉൾപ്പെടുത്തി. ഈ ആശയത്തിന് ജനദ്രോഹം കൈമുതലാക്കിയ ഒരു കാഞ്ഞ ബുദ്ധിയുടെ കൈയ്യൊപ്പും കാണാം.

കൊക്കുകളെയും കുളക്കോഴികളെയും സാക്ഷാൽ കോഴികളെയും അറിയുന്നവർക്കും അറിയേണ്ടവർക്കും നന്നായി അറിയാം. അതിനു റിപ്പോർട്ടിന്റെ ആവശ്യമില്ല. കെണിയിൽ അകപ്പെട്ടവരുടെയും കെണി തേടിപ്പോയവരുടെയും കാര്യവും അങ്ങനെ തന്നെ. തേയ്ക്കപ്പെട്ടവരും ബുള്ളിയിംഗും പ്രതികാരവും ബ്ളാക്ക് മെയിലിംഗും ഒക്കെ ഉഭയസമ്മിതിയെ കാലാന്തരം അതിക്രമമാക്കി മാറ്റിയേക്കും. നാം കണികണ്ട് ഉണരുന്ന നന്മയെ പോലെ സൂക്ഷിക്കണം.അല്ലെങ്കിൽ പിരിയും.പുളിക്കും.