സെലിബ്രിറ്റികളെ കൊണ്ട് ജീവിച്ചുപോകുന്ന അഥവാ വയറ്റിപ്പിഴപ്പിന് വഴി കണ്ടെത്തുന്ന കല വ്യവസായമായി മാറിയ നാടാണ് കേരളം. നാട്ടിലാണെങ്കിൽ സെലിബ്രിറ്റികൾക്കൊട്ട് പഞ്ഞവുമില്ല താനും. യേശുദാസ്,വയലാർ, സത്യൻ, പ്രേംനസീർ, മമ്മൂട്ടി, മോഹൻലാൽ, ജഗതി ശ്രീകുമാർ, മാധവിക്കുട്ടി , വൈക്കം മുഹമ്മദ് ബഷീർ, കുഞ്ഞുണ്ണി മാഷ്, പിടി ഉഷ, തുടങ്ങി ഒരേ സമയം മലയാളികളുടെ സ്വകാര്യ അഹങ്കാരവും പൊതു സ്വത്തുമായി മാറിയ പ്രശസ്തരുടെ പട്ടിക പറഞ്ഞാൽ തീരില്ല. ഇവരെ കുറിച്ചിട്ടുള്ള ദൃശ്യ ശ്രവ്യ പരിപാടികൾ മടുപ്പില്ലാതെ കാണുന്നവരുമാണ് മലയാളികൾ. ഇവരുടെ പേരും പ്രശസ്തിയും മുതലെടുത്ത് അതിന്റെ ഓരം പറ്റി ഒരംശം പിടിച്ച് പറ്റാൻ ശ്രമിക്കുന്ന കുതന്ത്രക്കാരും കുറവല്ല. സാധാരണക്കാരല്ലേ ജീവിതമാർഗമല്ലേ എന്ന് കരുതി പലരും ഇവരെ വെറുതെ വിടാറാണ് പതിവ്. എന്നാൽ പേരും പെരുമയും പ്രശസ്തിയും മറ്റ് ജീവിതമാർഗങ്ങളും ഉള്ള ചിലർ പൊതു താൽപര്യം എന്ന പേരിൽ സെലിബ്രിറ്റികളെ പൊതു സമൂഹ സമക്ഷം വലിച്ചിഴയ്ക്കുമ്പോൾ അതിൽ കുത്തിത്തിരിപ്പ് കാണാതിരിക്കുന്നത് എങ്ങനെ. ശിവഗിരി മഠത്തിന്റെ നേതൃത്വത്തിൽ യേശുദാസിന് ഗുരുവായൂർ അമ്പലത്തിൽ പ്രവേശനം വേണമെന്ന് ആവശ്യപ്പെട്ട് പ്രക്ഷോഭം തുടങ്ങുമെന്ന സ്വാമി സച്ചിദാനന്ദയുടെ താല്പര്യത്തെയാണ് ഇപ്പോൾ സമൂഹം വിലങ്ങും തല്ലി ചതക്കുന്നത്.

ഭഗവാനിലും വലുതല്ല ഭക്തർ; ആനയിച്ച് കൊണ്ടുവരേണ്ടവരല്ല, അറിഞ്ഞ് വരേണ്ടവരാണ്.

1965 ൽ ഓർഡിനൻസ് ആയി വരികയും 1968 ലെ ഇഎംഎസ് സർക്കാർ പാസാക്കിയ ടെമ്പിൾ എൻട്രി ആക്ടും ഈ നിയമത്തിന്റെ ചട്ടങ്ങളിൽ ആർക്കൊക്കെ കയറാൻ കയറിക്കൂടാ എന്ന് പറയുന്നുണ്ട്. അതിലേക്ക് പോലും ഈ വിഷയം എത്തിപ്പെടുന്നില്ല എന്നതാണ് സത്യം. പത്മനാഭസ്വാമി ക്ഷേത്രത്തിൽ കയറണമെന്ന് ആവശ്യപ്പെട്ട ശേഷം നാളിതുവരെ യേശുദാസ് എന്തുകൊണ്ട് അങ്ങോട്ടേക്ക് എത്തിയില്ല എന്ന ചോദ്യവും പ്രസക്തമാകുന്നത് പല കാരണങ്ങൾ കൊണ്ടാണ്. അതുകൊണ്ടാണ് യേശുദാസ് മൗനം വെടിയണം എന്ന അഭിപ്രായങ്ങൾ പൊതുസമൂഹത്തിൽ ഉയരുന്നത്. വായുവിൽ നിന്ന് ഭസ്മം എടുക്കുന്ന കൺകെട്ട് വിദ്യയെ തോൽപ്പിക്കും മാതിരി കേരളത്തിന്റെ സാമൂഹ്യ അന്തരീക്ഷത്തിൽ ഇല്ലാത്ത ഒരു വിഷയം ഉണ്ടെന്ന് സങ്കൽപ്പിച്ച് അത് ഉയർത്തിക്കാട്ടി കൊടിപിടിക്കാൻ ഒരുങ്ങുന്ന സന്യാസി ശ്രേഷ്ഠനെ ജനം സംശയദൃഷ്ടിയോടെ നോക്കിക്കാണും. തർക്കമില്ല. കേരള ഗവർണർ ആയിരുന്ന ആരിഫ് മുഹമ്മദ് ഖാന് കയറാൻ കഴിയുമെങ്കിൽ പിന്നെ യേശുദാസിന് എന്തെങ്കിലും അയിത്തം ഉണ്ടാകാൻ ഇടയുണ്ടോ. പിന്നെന്തിന് ഈ കോലാഹലം പ്രക്ഷോഭം എന്ന പേരിൽ ആ കോലാഹലത്തിന് കൊടി പിടിക്കാൻ എന്തിനൊരു സന്യാസ ശ്രേഷ്ഠൻ. കാലം എല്ലാം കാണട്ടെ. മനസ്സിലാക്കട്ടെ, മറുപടി നൽകട്ടെ