മഴവിൽ പൊട്ടൻമാരുടെ ചവിട്ടു നാടകങ്ങൾ

മഴവിൽ പൊട്ടൻമാരുടെ ചവിട്ടു നാടകങ്ങൾ

മോഹൻ കെ കൃഷ്ണൻ

22 March 2025, 5:29 pm

വിയർപ്പൊഴുക്കി പണിയെടുത്താൽ പോലും രണ്ടറ്റവും കൂട്ടിമുട്ടിക്കാൻ കഴിയാത്ത ആശമാർ വേതനം കൂട്ടി ചോദിക്കുമ്പോൾ ഞഞ്ഞാ പിഞ്ഞായാണ് മറുപടി. പുട്ടിനു പീരപോലെ കേന്ദ്ര വിരുദ്ധമെന്ന അപസർപ്കഥയും. എന്താ പരിണാമഗുപ്തി! ഈ ദിനവേതനം കൊണ്ടു കൂട്ടിയാൽ കൂടില്ലെന്ന് ബുദ്ധിപരമായി വെല്ലുവിളി നേരിടാത്ത ആർക്കുമറിയാം. ഇച്ചിരി സഹാനുഭൂതി.കരൂണ ഏതവനും ഏതവൾക്കുമാകാം.

26000 പേർക്ക് 1000രൂപ എങ്കിലും കൂട്ടി നൽകാൻ ഒരു പൊടിക്ക് ദുരഭിമാനം, ഒരു പൊടിക്കു ധൂർത്ത് മാത്രം കുറച്ചാൽ മതി. ഭാവിയിലെ അവധി വ്യാപാരത്തിൽ അതു നേട്ടവുമാകാം.

പൊരിവെയിലും വേനൽ മഴയും ശാരീരിക വിഷമതകളും അസ്വാസ്ഥ്യങ്ങളും സഹിച്ച് തൊരുവോരത് നിരഹാര സമരം നടത്തുന്നത് വനിതകളാണ്. നിങ്ങളുടെ സെമിനാർ വിഷയങ്ങളിലെ ഹീറോകൾ

മനസാക്ഷി മരവിച്ച നാവേറികളുടെ ജല്പനങ്ങളും വെല്ലുവിളികളും നാശത്തിന്റെ നരക വാതിലുകളാണ് തുറക്കുന്നത്.

ഓരോ സ്ത്രീയുടെയും ആത്മാഭിമാനത്തെയും അന്തസിനെയും ഹനിക്കുന്നത് കൊടും മനുഷ്യാവകാശ ലംഘനവുമാണ്. ഏതോ വികലന്റെ കാപ്സൂൾ വിഴുങ്ങിയാണ് മന്ത്രിയും തന്ത്രിയും അന്തവും കുന്തവും തിരിയാത്ത മറ്റു ഭൂതത്താൻമാരും ഇവിടെ ബലിച്ചോറിളക്കുന്നത്.ഒരേ രൂപവു.ഭാവവുമുള്ള ഈ ഫാക്ടറി ഉല്പന്നം ചങ്ങാത്ത മുതലാളിമാരുടെ സഹവാസ സമ്മാനമായി കരുതാം.

പൊള്ളുന്ന ജീവിത യാഥാർത്ഥ്യങ്ങളാണ് ഏറ്റവും വലിയ വിദ്യാലയവും കലാശാലയും .അതിന്റെ പ്രതിനിധാനമാണ് വീട്ടമ്മമാരായ ആശമാർ. വാർത്താ ചാനലുകളിൽ പരിണത പ്രജ്ഞരെ നിലത്തടിക്കുന്നത് ആ ആത്മബലമാണ്. തൊലിക്കട്ടിയും നാവിന്റെ നീളവും വാക്കുകളുടെ വയറിളക്കവും പ്രസംഗ തൊഴിലും പുലഭ്യം പറച്ചിലും നിയമ ബിരുദവും ആനുഭാവിക തലത്തിൽ വെറും തൃണമാകുന്നു.

Keywords:

Recent in Analysis

Must Read